గ్రీన్ కార్డు కోసం మరికొంత కాలం.. నిరీక్షణ తప్పదు!

అమెరికాలో గ్రీన్‌ కార్డు కోసం భారతీయులు మరికొంత కాలం వేచిచూడాల్సిన పరిస్థితి ఏర్పడుతోంది. 3,69,322 ఎంప్లాయ్‌మెంట్‌ వీసా పిటిషన్లకు ఆమోదం పొందిన వారు గ్రీన్‌కార్డు కోసం ఎదురుచూస్తున్నారు. వీరంతా ఈబీ2, ఈబీ3 (వృత్తి నిపుణులు, నైపుణ్యం కలిగి  వర్కర్లు) కేటగిరీల కింద దరఖాస్తు చేసుకున్నారు. వలస కార్మికులకు వీసాలు స్పాన్సర్‌ చేసేందుకు టెక్నాలజీ కంపెనీలు వీటిని వినియోగించుకుంటాయి. ఉపాధి ఆధారిత గ్రీన్‌ కార్డును పొందడానికి మొదటి అడుగైన పామ్‌ ఐ-140 అప్రూవల్‌ను ఈ దరఖాస్తుదారులు పొందారు. ఐ-140 అప్రూవల్‌ తర్వాత గ్రీన్‌కార్డుల కోసం భారతీయులు ఏళ్ల తరబడి ఎదురుచూడాల్సి వస్తోంది.

యూఎస్‌ సిటిజన్‌షిప్‌ అండ్‌ ఇమిగ్రేషన్‌ సర్వీసెస్‌ (యూఎస్‌సీఐఎఎస్‌) ప్రాసెసింగ్‌లో జాప్యమే దీనికి కారణమని ఇమిగ్రేషన్‌ డాట్‌ కామ్‌ మేనేజింగ్‌ పార్ట్‌నర్‌ రాజీవ్‌ ఎస్‌ ఖన్నా చెబుతున్నారు. యూ ఎస్‌సీఐఎస్‌ వివరాల ప్రకారం 2022 సంవత్సరం మొదటి రెండు త్రైమాసికాల్లో భారతీయులు అధిక సంఖ్యలో ఐ-140 పిటిషన్లు దాఖలు చేశారు. ఆరు నెలల్లో ఏజెన్సీకి 37,719 దరఖాస్తులు వచ్చాయి. ఇదేకాలంలో 25,274 ఐ-140 దరఖాస్తులకు ఆమోదం లభించింది.