నా సినిమాపై ఏదైతే పోలికలతో చెబుతున్నారో అవన్నీ సినీ ఇండస్ట్రీలో ఎవర్ గ్రీన్ మూవీస్ : కళ్యాణ్ రామ్

నా సినిమాపై  ఏదైతే పోలికలతో చెబుతున్నారో అవన్నీ సినీ ఇండస్ట్రీలో ఎవర్ గ్రీన్ మూవీస్ : కళ్యాణ్ రామ్

‘బింబిసార’ సినిమాతో ఆగస్ట్ 5న తెలుగు ప్రేక్షకులను పలకరించటానికి హీరో, నిర్మాత కళ్యాణ్ రామ్ సిద్ధమవుతున్నారు. ఈ సందర్భంగా ఆయన ప్రమోషనల్ యాక్టివిటీస్‌తో బిజీగా ఉన్నారు. ఈ నేపథ్యంలో కొందరు జర్నలిస్టులు ప్రస్తుతం టాలీవుడ్‌లో జరుగుతున్న పరిస్థితులపై ప్రశ్నించినప్పుడు నంద‌మూరి క‌ళ్యాణ్ రామ్ మాట్లాడుతూ ‘‘మా ‘బింబిసార’ సినిమా టీజర్ రిలీజ్ అయినప్పుడు ‘మగధీర’ ఉందని అన్నారు. ట్రైలర్ రిలీజ్ అయిన తర్వాత ‘బాహుబలి’లా ఉందని అంటున్నారు. ఇప్పుడు ‘ఆదిత్య 369’ అంటున్నారు. ఏదేమైనా నేను హ్యాపీనే. ఎందుకంటే ఏదైతే పోలికలతో చెబుతున్నారో అవన్నీ తెలుగు సినిమా ఇండస్ట్రీలో బెస్ట్ మూవీస్. ‘బింబిసార’ సినిమాను ప్రారంభించే సమయంలో ఓ బడ్జెట్ అనుకున్నాం. అయితే పాండమిక్ తర్వాత డిజిటల్ స్పేస్ పెరిగింది. ఆ వేల్యూ తెలుగు సినిమాల‌కు బాగా పెరిగింది. దాన్ని బ‌ట్టి మా బ‌డ్జెట్‌ను కాస్త పెంచుకున్నాం’’ అన్నారు.

జనాలు థియేటర్స్‌కు ఎందుకు రావ‌టం లేదు. ప్ర‌స్తుతం టాలీవుడ్‌లో సినిమాల షూటింగ్స్ ఆగిపోవ‌టం అనే స‌మ‌స్య‌పై మీ స్పంద‌న ఏంట‌ని అడిగిన ప్ర‌శ్న‌కు క‌ళ్యాణ్ రామ్ మాట్లాడుతూ ‘‘థియేట‌ర్స్‌కు జ‌నాలు రాక‌పోవ‌టం అనేదాన్ని సమస్యగా నేను చూడటం లేదు. ఎందుకంటే మేజ‌ర్‌, విక్ర‌మ్ సినిమాల‌ను జ‌నాలు థియేట‌ర్స్‌లో ఎందుకు చూశారు. ప్రేక్ష‌కుల‌కు సినిమా రిలీజ్ కంటే ముందు మ‌నం ఇచ్చే కంటెంట్ న‌చ్చితే క‌చ్చితంగా వ‌స్తారు. బావుంద‌ని టాక్ వ‌స్తే తండోప‌తండాలుగా వ‌స్తారు. ఇది ఎప్పుడూ జ‌రిగేదే. కానీ బ‌య‌ట ఉన్న వాళ్లే రావ‌ట్లేదు అని ఎక్కువ‌గా అంటున్నారు. జ‌నాలు థియేట‌ర్స్‌కు రావ‌టం లేద‌నే దాన్ని నేను న‌మ్మ‌ను. తెలుగు ప్రేక్ష‌కుల‌కు సినిమాల‌ను మించిన ఎంట‌ర్‌టైన్మెంట్ లేదు. అయితే వాళ్ల‌కు న‌చ్చే క‌థ‌తో చేస్తే చాలు. సింపుల్‌గా చెప్పాలంటే విక్ర‌మ్ సినిమా మ‌రి ఎందుకు ఆడింది’’ అని అన్నారు. అయితే సినీ ఇండ‌స్ట్రీలో జ‌రుగుతున్న షూటింగ్స్ బంద్ గురించి మాత్రం ఆయ‌న స్పందించ‌లేదు. త‌న‌కు సంబంధం లేద‌ని చెప్పేశారు. డైరెక్ట‌ర్స్ స‌రైన స్క్రిప్ట్స్‌తో రావ‌టం లేదు అని చిరంజీవి చేసిన వ్యాఖ్య‌ల‌పై కూడా క‌ళ్యాణ్ రామ్ స్పందించారు. ‘‘చిరంజీవిగారు చేసిన వ్యాఖ్యలు ఆయన అభిప్రాయం. అసలు చిరంజీవిగారు ఏమన్నారో నాకు పూర్తిగా తెలియదు’’ అన్నారు.

 

Tags :