ఇప్పటి జనరేషన్ ను బట్టి సెన్సార్ కమిటీ కూడా బూతు పదాలని వదిలేస్తుందా?

ఇప్పటి  జనరేషన్ ను  బట్టి సెన్సార్ కమిటీ కూడా బూతు పదాలని వదిలేస్తుందా?

ఇటీవల డైలాగ్స్ విషయంలో సెన్సార్ కమిటీ పట్టించుకోవడం లేదా? అని ప్రశ్నిస్తున్నారు సినీ జనం. సంభాషణల ప‌రంగా ఇక‌పై సినిమా క్ర‌మంగా ఓటీటీ బాట ప‌డుతుందా? ఏమో చూస్తుంటే అలా అనిపించ‌క త‌ప్ప‌డం లేద‌ని కొంద‌రు భావిస్తున్నారు. ఇంత‌కీ ఏ విష‌యంలో అని అనుకుంటున్నారా? డైలాగ్స్ విష‌యంలో. వివ‌రాల్లోకెళ్తే.. హీరో సుధీర్ బాబు రీసెంట్ మూవీ శ్రీదేవి సోడా సెంటర్‌లో, హీరోయిన్ తమన్నా భాటియా నటించిన సీటీమార్‌లో బూతు మాటలు మాట్లాడటంపై కొందరు అభ్యంతరం వ్యక్తం చేశారు. ఇది వ‌ర‌కు సినిమాల్లో చిన్న బూతు మాట వినిపించినా కూడా సెన్సార్ క‌మిటీ బీప్ సౌండ్ రావ‌డ‌మో లేక మ్యూట్ చేయ‌డ‌మో.. అంత‌కు మించి పోతే ఎడిట్ చేయ‌మ‌ని చెప్పేది. కానీ రీసెంట్‌గా విడుద‌లైన రెండు సినిమాల‌ను గ‌మ‌నిస్తే అందులోని బూతు మాట‌లు విన్న కొంత మంది ఆడియెన్స్‌కు షాకింగ్‌గా అనిపించాయి. అది కూడా సినిమాలో హీరో, హీరోయిన్ ప‌ల‌క‌డం కాస్త ఇబ్బందిక‌రంగా అనిపించింది.

కొంద‌రు సినీ విమ‌ర్శ‌కులు అయితే, సెన్సార్ క‌మిటీవాళ్ల‌కు ఆ ప‌దం త‌ప్పుగా క‌నిపించ‌లేదా? ఎందుకు మ్యూట్ చేయ‌లేదు? అని కూడా అనుకున్నారు. రీసెంట్‌గా విడుద‌లైన శ్రీదేవి సోడా సెంట‌ర్‌లో హీరో సుధీర్‌బాబుతో క్లైమాక్స్‌లో ఓ బూతుప‌దాన్ని, సీటీమార్ చిత్రంలో హీరోయిన్ త‌మ‌న్నాతో అదే బూతు ప‌దాన్ని ప‌లికించారు ద‌ర్శ‌కుడు. హీరో, హీరోయిన్స్‌తో ఇలాంటి ప‌దాన్ని ప‌లికించ‌డం ఎంత వ‌ర‌కు స‌మంజ‌సం అని బాహాటంగానే అంద‌రూ మాట్లాడుకున్నారు. అయితే దీనిపై సెన్సార్ స‌భ్యులు వివ‌ర‌ణ ఇలా ఉంది. ‘‘మ‌నం కోపంలో ఉన్న‌ప్పుడు, ఎమోష‌న‌ల్ అయిన‌ప్పుడు మ‌న‌కు తెలియ‌కుండానే త‌ప్పుడు మాట‌ల‌ను మాట్లాడుతుంటాం. అలాగే సినిమాలోనూ ఉప‌యోగించిన బూతు ప‌దం, స‌న్నివేశం డిమాండ్ చేసిందా? లేదా? అని ఆలోచించే నిర్ణ‌యం తీసుకుంటాం. అలా కాకుండా ఆక‌తాయి స‌న్నివేశాల్లో ఇత‌రుల‌ను కించ ప‌రిచే స‌న్నివేశాల్లో బూతు ప‌దాలుంటే ఒప్పుకోం’’ అని తెలిపారు.ఇప్పుడు సెన్సార్ కమిటీ సభ్యులు ఇలా ఆలోచించడం కరెక్టే కానీ.. ఇప్పటికే సినిమాల్లో బోల్డ్ సీన్స్ ఇది వరకటికంటే ఎక్కువ అయ్యాయి. దీంతో చిన్నపిల్లలతో కలిసి సినిమాకు వచ్చే ఫ్యామిలీ ఆడియెన్స్ సంఖ్య తగ్గింది. ఇప్పుడు సంభాషణల విషయంలోనూ ఇలాంటి నిర్ణయాలుంటే సినిమా థియేటర్స్ వైపుకు రావడానికి ఫ్యామిలీ ఆడియెన్స్ ఆలోచిస్తారనడంలో సందేహం లేదు.

 

Tags :