హెడ్ క్వార్టర్స్ ఫర్ సేల్.. కాగ్నిజెంట్ కీలక నిర్ణయం..!

ప్రపంచంలోని అతిపెద్ద టెక్ కంపెనీల్లో ఒకటైన కాగ్నిజెంట్ కీలక నిర్ణయం తీసుకుంది. భారత్‌లోని తన ప్రధాన కార్యాలయాన్ని అమ్మకానికి పెట్టింది. తమిళనాడు, చెన్నైలోని ఒక్కియం తొరాయ్‌పక్కం ఐటీ కారిడార్‌లో ఉన్న భవనాన్ని దాదాపు 20 సంవత్సరాలుగా తమ హెడ్ ఆఫీసుగా వినియోగిస్తోంది కాగ్నిజెంట్. 15 ఎకరాల విస్తీర్ణంలో నాలుగు లక్షల చదరపు అడుగుల వైశాల్యంలో ఈ భవనాన్ని నిర్మించారు. ఈ ఆఫీసు భవనం విలువ సుమారు రూ.750 కోట్ల నుంచి రూ.800 కోట్ల వరకు ఉంటుందని ప్రముఖ స్థిరాస్తి సంస్థలు అంచనా వేస్తున్నాయి.

ఈ భవనం విక్రయించే బాధ్యతలను అంతర్జాతీయ రియల్ ఎస్టేట్ సర్వీసెస్ సంస్థ జేఎల్ఎల్‌కు అప్పగించినట్లు ప్రముఖ మీడియా సంస్థ టైమ్స్ ఆఫ్ ఇండియా తెలిపింది. కాగ్నిజెంట్‌కు చెందిన ఈ భవనం విక్రయించే పనిలో భాగంగా ఇప్పటికే భాష్యం గ్రూప్, కాసగ్రాండ్ సంస్థలతో జేఎల్ఎల్ రియాల్టీ సంస్థ చర్చలు జరిపినట్లు తెలుస్తోంది. అయితే, వాటి నుంచి పెద్దగా స్పందన రాలేదని సమాచారం. ఈ భవనం విక్రయం విషయంలో ఆ రెండు సంస్థలకు సంబంధించి కాగ్నిజెంట్, జేఎల్ఎల్ ఎంటువంటి వ్యాఖ్యలు చేయలేదు.

అయితే, 2024, డిసెంబర్ నాటికి ఈ కార్యాలయాన్ని సాఫ్ట్‌వేర్ సంస్థ కాగ్నిజెంట్ ఖాళీ చేసే అవకాశాలు ఉన్నాయి. జీఎస్‌టీ రోడ్డులోని తంబారం సమీపంలో కొత్త హెడ్ ఆఫీసు నిర్మాణం పూర్తయి డిసెంబర్ నాటికి అందుబాటులోకి వస్తుందని భావిస్తున్నారు. అందులోకి మారుతున్న క్రమంలోనే ఈ భవనాన్ని విక్రయిస్తున్నట్లు వాదనలు వినిపిస్తున్నాయి. చెన్నైలోని తన కార్యకలాపాలను కాగ్నిజెంట్.. ఎంఈపీజెడ్, షోలింగనల్లూర్, సిరుసేరిలోని మూడు భవనాల్లో ఏకీకృతం చేస్తున్నట్లు తెలుస్తోంది.

ఇక్కడ డీఎల్ఎఫ్, సెయింట్ మేరీస్ రోడ్డులోని కార్యాలయాల లీజులను వదిలేసుకుంది కాగ్నిజెంట్. మరోవైపు.. తొరైపాక్కం కార్యాలయం 20 సంవత్సరాలకుపైగా కాగ్నిజెంట్ భారత దేశ ప్రధాన కార్యాలయంగా ఉంది. కాగ్నిజెంట్ సహ వ్యవస్థాపకులు లక్ష్మీ నారాయణన్, చంద్రశేఖరన్ ఇక్కడి నుంచే తమ విధులు నిర్వర్తిస్తున్నారు. చెన్నై సహా హైదరాబాద్‌లోని ఆఫీసులను కాగ్నిజెంట్ విక్రయిస్తున్నట్లు గతేడాది డిసెంబర్ లోనే వార్తలు వచ్చాయి. అయితే, ఇప్పుడు చెన్నై హెడ్ ఆఫీస్ అమ్మకానికి పెట్టినట్లు తెలుస్తోంది.