బ్రెజిల్లో జి 20 సదస్సు సందడి.. ప్రపంచనేతలతో మోడీ వరుస భేటీలు..

బ్రెజిల్ లోని రియోజీజెనిరో అగ్రనేతలతో కళకళలాడుతోంది. అమెరికా అధ్యక్షుడు బైడన్ నుంచి వివిధ దేశాధి నేతలు.. అక్కడి వరుస భేటీలతో బిజీబిజీగా గడుపుతున్నారు. రెండురోజుల సదస్సులో భాగంగా భారత ప్రధాని మోడీ.. యూఎస్, ఇటలీ, యూకే, ఇండోనేషియా, నార్వే, పోర్చుగల్, బ్రిటన్, ఫ్రాన్స్ తదితర దేశాధినేతలతో భేటీ అయ్యారు. అమెరికా అధ్యక్షుడు బైడెన్ తో మోడీ కొద్దిసేపు చర్చించారు. అమెరికాలో ఎన్నికల అనంతరం వారిద్దరూ కలుసుకోవడం ఇదే తొలిసారి. బ్రెజిల్, సింగపూర్, స్పెయిన్ దేశాధినేతలు లులా డ సిల్వా, లారెన్స్ వాంగ్, పెడ్రో శాంచెజ్ లతో మోడీ సంభాషించారు. ఐక్యరాజ్య సమితి ప్రధాన కార్యదర్శి ఆంటోనియో గుటెరస్ తోనూ మోడీ భేటీ అయ్యారు. ఈ వివరాలను ప్రధాని స్వయంగా తన ట్విటర్ ఖాతాలో షేర్ చేశారు.

మై ఫ్రెండ్ మెక్రాన్...

ఫ్రాన్స్ అధ్యక్షుడు ఇమ్మాన్యుయేల్ మెక్రాన్ తో మోడీ భేటీ అయ్యారు. ‘నా స్నేహితుడు, అధ్యక్షుడు ఇమ్మాన్యుయేల్ మెక్రాన్ ను కలవడం ఎంతో సంతోషంగా ఉంది. భారత్, ఫ్రాన్స్ లు అంతరిక్షం, ఇందనం, ఏఐ వంటి ఇతర రంగాల్లో సన్నిహితంగా పనిచేయడంపై చర్చించాం. ఇరుదేశాల ప్రజల మధ్య సంబంధాలను బలపర్చేందుకు పనిచేస్తాం’ అంటూ మోదీ తన పోస్టులో తెలిపారు.

బ్రిటన్ తో కలసి అడుగులు ..

బ్రిటన్ ప్రధాని కీర్ స్టార్మర్ తోనూ భారత ప్రధాని మోడీ సమావేశమయ్యారు. ఈ సందర్భంగా పలు అంశాలపై చర్చించారు. కీర్ స్టార్మర్ బృందంతో భేటీ అనంతరం మోడీ తన ట్విటర్ ఖాతాలో వివరాలను వెల్లడించారు. ‘రియో డీజెనిరోలో జీ20 సమ్మిట్ సందర్భంగా బ్రిటన్ ప్రధాన మంత్రి కీర్ స్మార్టర్ భేటీ జరిగింది. రాబోయే కాలంలో సాంకేతికత, గ్రీన్ ఎనర్జీ, భద్రత, ఆవిష్కరణ వంటి రంగాల్లో బ్రిటన్ తో కలిసి పనిచేసేందుకు ఆసక్తిగా ఉన్నాం. వాణిజ్యంతో పాటు సాంస్కృతిక సంబంధాలనుసైతం బలపర్చాలనుకుంటున్నాం’ అని ప్రధాని మోడీ తెలిపారు.

జి 20లో మెలోడీ రాగం..

ఇటలీ ప్రధాని జార్జియా మెలోనితోనూ ప్రధాని మోడీ భేటీ అయ్యారు. ఈ భేటీలో ఇరువురు నేతలు వాణిజ్యం, పెట్టుబడులు, సాంకేతిక రంగాల్లో సహకారాన్ని పెంపొందించుకోవడంతోపాటు సాంస్కృతిక సంబంధాలను బలోపేతం చేసుకోవడంపై చర్చించారు. వీరి భేటీ అనంతరం మోదీ ట్విటర్ లో వివరాలను షేర్ చేశారు. ‘రియో డీ జెనీరో జీ20 సదస్సు సందర్భంగా ప్రధాని జార్జియా మెలోనిని కలవడం చాలా ఆనందంగా ఉంది. మా చర్చలో ఇరుదేశాల రక్షణ, భద్రత, వాణిజ్యం, సాంకేతికత తదితర అంశాలలో సంబంధాలను బలోపేతం చేయడంపై దృష్టి పెట్టాం. దీనితోపాటు భారత్, ఇటలీ దేశాల మధ్య స్నేహం గురించి కూడా చర్చించినట్లు మోడీ తెలిపారు.