న్యూజిలాండ్‌ ప్రధానితో టీడీపీ ఎమ్మెల్యేల భేటీ
మన ఆంధ్ర తెలుగు అసోసియేషన్‌, న్యూజిలాండ్‌ ఎన్నారై టీడీపీ ఆహ్వానం మేరకు పర్చూరు, బాపట్ల టీడీపీ ఎమ్మెల్యేలు న్యూజిలాండ్‌ పర్యటనకు వెళ్లారు. న్యూజిలాండ్‌ ప్రధాన మంత్రి క్రిస్టోఫర్‌ లక్సన్‌ను టీడీపీ ఎమ్మెల్యేలు మర్యాదపూర్వకంగా కలిశారు. ఈ సందర్భంగా పలు అంశాలపై ప్రధానితో మాట్లాడారు. రాష్ట్రాభివృద్ధి కోసం ఆంధ్రప్రదేశ్‌ సీఎం చంద్రబాబు చేపట్టిన వివిధ కార్యక్రమాలను ప్రధానికి వివరించారు. చంద్రబాబు తనకు తెలుసని, మంచి విజనరీ నాయకుడుని క్రిస్టోఫర్‌ కితాబిచ్చారు. చంద్రబాబు సారథ్యంలో నెలకొల్పిన కియా కార్లు ఆంధ్రప్రదేశ్‌ నుంచి న్యూజిలాండ్‌కు వస్తున్నాయని ఎమ్మెల్యేలు ఆయనకు చెప్పారు. ఆంధ్రప్రదేశ్‌ రాష్ట్ర పర్యటనకు రావాలని న్యూజిలాండ్‌ ప్రధానిని ఎమ్మెల్యేలు ఆహ్వానించారు. ఆంధ్రప్రదేశ్‌లో భారీ పరిశ్రమలను నెలకొల్పాలని కోరారు. ఈ మేరకు మార్చిలో అమరావతి పర్యటనకు వస్తానని ప్రధాని మంత్రి క్రిస్టోఫర్‌ లక్సన్‌ తెలిపారు.
ఈ సమావేశంలో ఎమ్మెల్యేలతో పాటు న్యూజిలాండ్‌ నేషనల్‌ పార్టీ ప్రతినిధులు శివ కిలారి, బాల వేణుగోపాల్‌ వీరం, టీడీపీ న్యూజిలాండ్‌ కో ఆర్డినేటర్‌ జితేందర్‌ నిమ్మగడ్డ, మన ఆంధ్ర తెలుగు అసోసియేషన్‌ నేతలు మద్దుకూరి దిలీప్‌, అశోక్‌ గోరంట్ల, న్యూజిలాండ్‌ ఎన్నారై టీడీపీ అసోసియేషన్‌ నాయకులు పాల్గొన్నారు.
