తెలంగాణలో ముగిసిన ఒలింపిక్‌ అసోసియేషన్‌ ఎన్నికలు
తెలంగాణ ఒలింపిక్‌ అసోసియేషన్‌ (టీవోఏ) ఎన్నికలు ముగిశాయి. ఎల్బీ స్టేడియంలోని ఒలింపిక్‌ భవన్‌ వేదికగా టీవోఏ కార్యవర్గ ఎన్నికలు ఉదయం నుంచి సాయంత్రం వరకు జరిగాయి. అధ్యక్ష పదవి కోసం రాష్ట్ర ప్రభుత్వ క్రీడా సలహాదారు ఏపీ జితేంతర్‌ రెడ్డి, రాష్ట్ర బ్యాడ్మింటన్‌ అసోసియేషన్‌ ఉపాధ్యక్షుడు చాముండేశ్వర్‌నాథ్‌ పోటీపడ్డారు. ప్రధాన కార్యదర్శి, కోశాధికారి పదవుల కోసం ఎన్నిక జరుగుతుండగా, మిగతా స్థానాలకు సభ్యుల ఎన్నికల లాంఛనం కానుంది. ప్రధాన కార్యదర్శి పదవి కోసం బాబురావు, మల్లారెడ్డి మధ్య పోటీ ఉండగా, కోశాధికారి కోసం సతీష్‌ గౌడ్‌, ప్రదీప్‌ కుమార్‌ రేసులో ఉన్నారు. ఇదిలా ఉంటే టీవోఏ ఎన్నికల్లో ఎలాగైనా విజయం సాధించాలన్న ఉద్దేశంతో ఉన్న జితేందర్రెడ్డి, చాముండేశ్వర్‌నాథ్‌ వర్గాలు తమ ప్రయత్నాలను చివరి వరకు కొనసాగించాయి. 68 మంది సభ్యులు ఉండగా, 59 ఓట్లు పోలయ్యాయి. హైకోర్టు తీర్పు నేపథ్యంలో ఎన్నికల ఫలితాలు తర్వాత ప్రకటించనున్నారు.
