డిసెంబర్‌ 23 నుంచి తానా చైతన్యస్రవంతి కార్యక్రమాలు
అమెరికాలో నాలుగు దశాబ్దాలకుపైగా తెలుగు కమ్యూనిటీకి విస్తృతంగా సేవలందిస్తూ, మరోవైపు తెలుగు భాష, తెలుగు కళలు, తెలుగు సంస్కృతి విస్తరణకు కృషి చేస్తున్న ఉత్తర అమెరికా తెలుగు సంఘం మాతృరాష్ట్రమైన ఆంధ్రప్రదేశ్‌, తెలంగాణ రాష్ట్రాలలో కూడా అనేక కార్యక్రమాలను చేస్తోంది. ప్రతి రెండు సంవత్సరాలకు ఓసారి అమెరికాలో పెద్దఎత్తున తానా మహాసభలను నిర్వహిస్తూ. ప్రపంచవ్యాప్తంగా ఉన్న తెలుగు కళాకారులను, తెలుగు ప్రముఖులను ఈ మహాసభలకు ఆహ్వానించడం ద్వారా అమెరికాలో తెలుగు వైభవాన్ని మహాసభల ద్వారా తెలియజేస్తోంది. వచ్చే సంవత్సరం జూలై 4 నుంచి 6 వ తేదీ వరకు తానా 22వ మహాసభలు వాషింగ్టన్‌ డీసిలో జరగనున్నాయి. ఈ మహాసభలకు ముందుగా మాతృరాష్ట్రంలో 'చైతన్య స్రవంతి' పేరుతో తెలుగు భాషాభివృద్ధిని ప్రోత్సహించేలా, మరుగునపడిన జానపదకళలను వెలుగులోకి తీసుకు వచ్చేలా తానా పలు కార్యక్రమాలను నిర్వహించడం సంప్రదాయంగా వస్తోంది.
ఇందులో భాగంగా డిసెంబర్‌ 23 నుంచి జనవరి 12వ తేదీ వరకు తానా చైతన్యస్రవంతి కార్యక్రమాలను తెలుగు రాష్ట్రాల్లో నిర్వహిస్తున్నట్లు 'తానా' అధ్యక్షుడు సతీష్‌ వేమన తెలిపారు. ఈ చైతన్యస్రవంతి కార్యక్రమాల్లో రైతు రక్షణకు ప్రాధాన్యం ఇస్తున్నట్లు చెప్పారు. రైతుల సంక్షేమం కోసం తానా ప్రత్యేకంగా కృషి చేస్తోందని ఇందులో భాగంగానే రైతుకోసం తానా అనే పేరుతో ఓ కార్యక్రమాన్ని నిర్వహిస్తోందని చెప్పారు. ఈ కార్యక్రమంలో భాగంగా పిచికారి మందుల వినియోగంలో రైతులకు ఉపయోగపడే రక్షణ సామాగ్రిని కిట్లుగా అందజేస్తున్నామని చెప్పారు. ప్రభుత్వ స్కూళ్ళలో డిజిటల్‌ తరగతుల ప్రారంభం, రచయితల వర్క్‌షాప్‌, ఎడ్లపందాలు, కర్నూలులో స్త్రీ శక్తి భవనం ప్రారంభం వంటి వాటితోపాటు సాంస్కృతిక కార్యక్రమాలను పెద్దఎత్తున నిర్వహిస్తున్నట్లు ఆయన చెప్పారు. గురజాల, విజయవాడ, తాడేపల్లిగూడెం, మద్దూరు, తణుకు, భీమిలి, మాడుగుల, కర్నూలు, కొత్తగూడెం, ఖమ్మం, హైదరాబాద్‌, మాచెర్ల, సత్తెనపల్లి, పుల్లడిగుంట, ఒంగోలు, రాజంపేట, తాళ్ళపాక, తిరుపతి, అవనిగడ్డ, పెనుగంచిప్రోలు, విజయవాడ, వీరవల్లి ప్రాంతాల్లో తానా చైతన్యస్రవంతి కార్యక్రమాలు జరుగుతాయని ఆయన వివరించారు.
మహోన్నతమైన తెలుగుభాష పట్ల, తెలుగు కళలపట్ల ప్రేమాభిమానాలను పునరుజ్జీవింపజేయాలన్న లక్ష్యంతో ఈ కార్యక్రమాలను తానా నిర్వహిస్తోందని సతీష్‌ వేమన తెలిపారు. తెలుగు భాష సాహిత్య సంపదలను, కళా సాంస్కృతిక వారసత్వాలను ముందుతరాలకు తెలియజేసే విధంగా నిర్వహించే వివిధ కార్యక్రమాల్లో తానా నాయకులు, సభ్యులు, అభిమానులు ముమ్మరంగా పాల్గొంటున్నారని, ఈ వేడుకలకు అందరూ రావాలని, కార్యక్రమాలను విజయవంతం చేయాలని ఆయన కోరారు.
చైతన్య స్రవంతి కార్యక్రమాలకు కో ఆర్డినేటర్‌గా తానా ప్రెసిడెంట్‌ ఎలక్ట్‌ జే తాళ్ళూరి వ్యవహరిస్తారని, రైతు కోసం కార్యక్రమాలకు డా. జానయ్య కోట కో ఆర్డినేటర్‌గా వ్యవహరిస్తారని చెప్పారు.